𐍃𐌰𐌱𐌱𐌰 𐍃𐌰 𐌲𐌿𐍄𐌰 𐌼𐌰𐍂𐍄𐍅𐍂

𐌳𐌰𐌲𐍃 𐌲𐌰𐌼𐌹𐌽𐌸𐌾𐌹𐍃: ·𐌹𐌱· 𐌰𐍀𐍂𐌴𐌹𐌻𐍃 (𐌰𐌹𐌺𐌺𐌻𐌴𐍃𐌾𐍉𐌽𐍃 𐍅𐌹𐍃𐍄𐍂𐍉𐍃 𐌾𐌰𐌷 𐌰𐌹𐌺𐌺𐌻𐌴𐍃𐌾𐍉 𐌰𐌿𐍂𐌸𐌰𐌿𐌳𐌰𐌿𐌺𐍃𐌴𐌹𐌽𐌰 𐍂𐌰𐌿𐌼𐌰𐌽𐌹𐍅𐌹𐍃𐌺𐌰), ·𐌹𐌴· 𐌰𐍀𐍂𐌴𐌹𐌻𐍃 (𐌰𐌹𐌺𐌺𐌻𐌴𐍃𐌾𐍉𐌽𐍃 𐍃𐌻𐌰𐌱𐌹𐍃𐌺𐍉𐍃), ·𐌹𐌷· 𐌰𐍀𐍂𐌴𐌹𐌻𐍃 (𐌰𐌹𐌺𐌺𐌻𐌴𐍃𐌾𐍉𐌽𐍃 𐌺𐍂𐌴𐌺𐌹𐍃𐌺𐍉𐍃)

𐍆𐌰𐌿𐍂𐌰𐍅𐌰𐌿𐍂𐌳𐌴𐌹𐍃 𐌰𐌿𐌺𐍂𐌹𐌳𐌹𐍃𐌺𐌹𐍃

𐍅𐌰𐍃 𐍅𐍂𐌰𐌺𐌾𐌰 𐍃𐌻𐌴𐌹𐌸𐍃 𐍅𐌹𐌸𐍂𐌰 𐍇𐍂𐌹𐍃𐍄𐌴𐌹𐌽𐌰𐌽𐍃 𐌷𐌹𐌽𐌳𐌰𐍂 𐌲𐌿𐍄𐌰𐌼. 𐍂𐌴𐌹𐌺𐍃 𐌲𐌿𐍄𐌹𐍃𐌺𐍃 𐍃𐌿𐌼𐍃 𐌵𐌰𐌼 𐌷𐌰𐌹𐌼, 𐌸𐌰𐍂𐌴𐌹 𐍃𐌰 𐍃𐌰𐌱𐌱𐌰 𐌲𐌿𐌳𐌰𐍆𐌰𐌿𐍂𐌷𐍄𐍃 𐌱𐌰𐌿𐌰𐌹𐌳𐌰, 𐌾𐌰𐌷 𐍆𐍂𐌰𐌷 𐌷𐌰𐌹𐌼𐌾𐌰𐌽𐍃, 𐍇𐍂𐌹𐍃𐍄𐌴𐌹𐌽𐍃 𐍅𐌴𐍃𐌴𐌹𐌽𐌰. 𐌰𐌽𐌳𐌷𐍉𐍆𐌿𐌽 𐌹̈𐌽𐌰 𐍃𐍅𐌰𐍂𐌰𐌽𐌳𐍃 𐌴𐌹 𐌽𐌹 𐌰𐌹𐌽𐍃𐌷𐌿𐌽 𐍅𐌴𐍃𐌴𐌹𐌽𐌰. 𐌸𐌰𐌽 𐍃𐍄𐍉𐌸 𐍃𐌰𐌱𐌱𐌰 𐍆𐌰𐌿𐍂 𐌸𐌰𐌽𐌰 𐍂𐌴𐌹𐌺 𐌾𐌰𐌷 𐌼𐌰𐌽𐌰𐌲𐌴𐌹𐌽, 𐌵𐌰𐌸𐌿𐌷: “𐌽𐌹 𐌰𐌹𐌽𐍃𐌷𐌿𐌽 𐍃𐍅𐌴𐍂𐌰𐌹 𐌰𐌹𐌸 𐌹̈𐌽 𐌼𐌴𐌹𐌽𐌰. 𐌹̈𐌺 𐌹̈𐌼 𐍇𐍂𐌹𐍃𐍄𐌴𐌹𐌽𐍃.” 𐍃𐌰 𐍂𐌴𐌹𐌺𐍃, 𐍃𐌰𐌹𐍈𐌰𐌽𐌳𐍃 𐌸𐌰𐌽𐌰 𐍅𐌰𐌹𐌽𐌰𐌷𐌰𐌽 𐌰𐍂𐌼, 𐌻𐌰𐌹𐌻𐍉𐍄 𐌹̈𐌽𐌰 𐌲𐌰𐌲𐌲𐌰𐌽 𐌹̈𐌽 𐌲𐌰𐍅𐌰𐌹𐍂𐌸𐌾𐌰, 𐌵𐌹𐌸𐌰𐌽𐌳𐍃: “𐍃𐌰 𐌼𐌰𐌲 𐌽𐌹𐌷 𐌿𐌱𐌹𐌻𐌰𐌱𐌰 𐌽𐌹𐌷 𐍅𐌰𐌹𐌻𐌰 𐍄𐌰𐌿𐌾𐌰𐌽.”

𐌰𐍆𐌰𐍂 𐌾𐌴𐍂 𐌱𐌹𐌸𐌴 𐍀𐌰𐍃𐌺𐌰 𐍅𐌰𐍂𐌸, 𐌲𐌿𐌳𐌾𐌰, 𐍃𐌰𐌽𐍃𐌰𐌻𐌰, 𐌵𐌰𐌼 𐌹̈𐌽 𐌸𐌹𐌶𐌰𐌹 𐌷𐌰𐌹𐌼𐌰𐌹 𐌾𐌰𐌷 𐌳𐌿𐌻𐌸𐌹𐌳𐌰 𐌼𐌹𐌸 𐍃𐌰𐌱𐌱𐌹𐌽. 𐌸𐌰𐌹 𐌷𐌰𐌹𐌸𐌽𐌰𐌹 𐍆𐌹𐌽𐌸𐌰𐌽𐌳𐌰𐌽𐍃 𐌰𐌽𐌰𐌺𐍃 𐌳𐌹𐍃𐌳𐍂𐌿𐍃𐌿𐌽 𐌱𐌰𐌿𐌰𐌹𐌽 𐍃𐌰𐌱𐌱𐌹𐌽𐍃 𐌾𐌰𐌷 𐌹̈𐌽𐌿𐌷 𐌱𐌻𐌴𐌹𐌸𐌴𐌹𐌽 𐌰𐌽𐌰𐍃𐍄𐍉𐌳𐌹𐌳𐌴𐌳𐌿𐌽 𐌼𐌰𐌽𐍃 𐌲𐌿𐌳𐌹𐍃 𐌳𐌿 𐌱𐌰𐌿𐍄𐌰𐌽, 𐌸𐌰𐌽, 𐌱𐌹𐌸𐌴 𐍃𐌰𐌱𐌱𐌰 𐌽𐌰𐌵𐌰𐌸𐍃 𐌸𐌰𐌹𐍂𐌷 𐌸𐌰𐌿𐍂𐌽𐌿𐌽𐍃 𐌸𐌿𐌽𐍃𐌰𐌽𐍃 𐍅𐌰𐍂𐌸, 𐌲𐌰𐌱𐌿𐌽𐌳𐌿𐌽 𐌸𐌰𐌽𐍃 𐌱𐌰𐌽𐍃 𐌱𐌰𐌲𐌼𐌰𐌼 𐌾𐌰𐌷 𐍃𐍉𐌺𐌹𐌳𐌴𐌳𐌿𐌽 𐌹̈𐌽𐍃 𐌽𐌰𐌿𐌸𐌾𐌰𐌽 𐌼𐌹𐌼𐌶, 𐌸𐌰𐍄𐌴𐌹 𐌲𐌰𐌻𐌹𐌿𐌲𐌰𐌲𐌿𐌳𐌰𐌼 𐌲𐌰𐍃𐌰𐌻𐌹𐌸 𐍅𐌰𐍃, 𐌹̈𐍄𐌰𐌽. 𐌹̈𐌸 𐌼𐌰𐌽𐍃 𐌲𐌿𐌳𐌹𐍃, 𐌲𐌰𐌼𐌿𐌽𐌰𐌽𐌳𐌰𐌽𐍃 𐍅𐌰𐌿𐍂𐌳𐌰 𐌰𐍀𐌰𐌿𐍃𐍄𐌰𐌿𐌻𐌴, 𐌽𐌹 𐍄𐌰𐌹𐍄𐍉𐌺𐌴𐌹𐌽𐌰 𐌸𐌰𐌽𐍃 𐍃𐌰𐌿𐌳𐌹𐌽𐍃 𐌲𐌰𐍅𐌰𐌼𐌼𐍉 𐌿𐌽𐍃𐌴𐌻𐌾𐍉. 𐍃𐌰 𐍂𐌴𐌹𐌺𐍃 𐌿𐌽𐌳 𐌰𐌽𐌳𐌹 𐌲𐌰𐍅𐌰𐍂𐌲𐌴𐌹𐌸 𐍃𐌰𐌱𐌱𐌹𐌽 𐌳𐌰𐌿𐌸𐌰𐌿 𐌾𐌰𐌷 𐌰𐍄𐌲𐌹𐌱𐌹𐌸 𐌹̈𐌽𐌰 𐌲𐌰𐌳𐍂𐌰𐌿𐌷𐍄𐌹𐌼. 𐍃𐌰𐌱𐌱𐌰 𐌹̈𐌳𐌳𐌾𐌰 𐌳𐌿 𐍃𐍄𐌰𐌳𐌰 𐍅𐌰𐌿𐍂𐍃𐍄𐍅𐌴𐌹𐌽𐍃 𐌼𐌹𐌸 𐍃𐍅𐌴𐌲𐌽𐌹𐌸𐌰𐌹, 𐌷𐌰𐌶𐌾𐌰𐌽𐌳𐍃 𐌲𐌿𐌸. 𐌱𐌹𐌲𐌹𐍄𐌰𐌽𐌳𐌰𐌽𐍃 𐌹̈𐌽 𐌹̈𐌼𐌼𐌰 𐌼𐌰𐌽𐌽𐌰𐌽 𐌲𐍉𐌸𐍃, 𐍃𐍉𐌺𐌹𐌳𐌴𐌳𐌿𐌽 𐌸𐌰𐌹 𐌲𐌰𐌳𐍂𐌰𐌿𐌷𐍄𐌴𐌹𐍃 𐌹̈𐌽𐌰 𐌹̈𐌽 𐍅𐌹𐌲𐌰 𐌲𐌰𐌻𐌰𐌿𐍃𐌾𐌰𐌽 𐌹̈𐌸 𐌸𐌰𐍄𐌰 𐌲𐌰𐌸𐍂𐌰𐌹𐌷 𐍃𐌰𐌱𐌱𐌹𐌽 𐌼𐌹𐌺𐌹𐌻𐌰𐌱𐌰 𐌵𐌰𐌸𐌿𐌷 𐌸𐌰𐌹𐌼 𐌲𐌰𐌳𐍂𐌰𐌿𐌷𐍄𐌹𐌼 𐌴𐌹 𐌴𐌹𐍃 𐍃𐌺𐌿𐌻𐌳𐌴𐌳𐌴𐌹𐌽𐌰 𐌰𐌽𐌰𐌱𐌿𐍃𐌽 𐌸𐌹𐍃 𐍂𐌴𐌹𐌺𐌹𐍃 𐌲𐌰𐍄𐌰𐌿𐌾𐌰𐌽. 𐌸𐌰𐌽 𐌱𐍂𐌰𐌷𐍄𐌴𐌳𐌿𐌽 𐌸𐌰𐌹 𐌲𐌰𐌳𐍂𐌰𐌿𐌷𐍄𐌴𐌹𐍃 𐌹̈𐌽𐌰 𐌳𐌿 𐌰𐍈𐌰𐌹, 𐌲𐌰𐌱𐌿𐌽𐌳𐌿𐌽 𐌷𐌰𐌻𐌻𐌿 𐌱𐌹 𐌷𐌰𐌻𐍃𐌰 𐌹̈𐍃 𐌾𐌰𐌷 𐍅𐌰𐌿𐍂𐍀𐌿𐌽 𐌹̈𐌽𐌰 𐌹̈𐌽 𐍅𐌰𐍄𐌹𐌽.

𐌸𐌰𐌽𐌰𐍃𐌴𐌹𐌸𐍃 𐌹𐍉𐌽𐌽𐌹𐌿𐍃 𐍃𐍉𐍂𐌰𐌽𐌿𐍃 𐌷𐌰𐍂𐌾𐌰𐍄𐌿𐌲𐌰 𐌺𐍂𐌴𐌺𐍃, 𐌹̈𐌽 𐌴𐍂𐌰𐌹 𐌱𐌰𐌻𐌰𐌹𐌽𐌹𐍃 𐌺𐌰𐌹𐍃𐌰𐍂𐌹𐍃, 𐌱𐌹𐌲𐌰𐍄 𐌽𐌰𐌿 𐍃𐌰𐌱𐌱𐌹𐌽𐍃 𐌰𐌽𐌰 𐍃𐍄𐌰𐌸𐌰 𐌲𐌰𐍅𐌰𐌿𐍂𐍀𐌰𐌽𐌰𐌽𐌰 𐌹̈𐌽 𐍅𐌹𐌲𐌰𐌽𐌰 𐌼𐌹𐌸 𐌲𐌿𐍄𐌰𐌼 𐌾𐌰𐌷 𐌰𐍄𐌽𐌰𐌼 𐌸𐌰𐌽𐌰 𐌳𐌿 𐌺𐌰𐍀𐍀𐌰𐌳𐌰𐌿𐌺𐌹𐌰.

𐍃𐌰𐌱𐌱𐌰 𐍅𐌴𐌹𐌷𐍃 𐌲𐌰𐍅𐌰𐌽𐌽 𐌹̈𐌽 ·𐍄𐌿𐌱·, 𐌼𐌹𐌸 ·𐌻𐌰· 𐌾𐌴𐍂𐌴.

𐍃𐌰𐌱𐌱𐌰 𐍃𐌰 𐌲𐌿𐍄𐌰 𐌹̈𐌽 𐍂𐌰𐌶𐌳𐌰𐌹 𐌲𐌿𐍄𐌹𐍃𐌺𐌰𐌹, 𐍃𐌺𐌴𐌹𐍂𐌴𐌹𐌽𐍃 𐍆𐍂𐌰𐌼 𐌹̈𐍉𐍃𐍄𐌰𐌹𐌷𐌰 (·𐌱:𐌺𐌴·).

Sabbas the Goth in the Gothic language, a translation by 2sh (2025).