𐍀𐍃𐌰𐌻𐌼𐍉 ·𐍂𐌻𐌷·

𐍆𐍂𐌰𐌿𐌾𐌰, 𐌲𐌰𐌺𐌰𐌿𐍃𐍄 𐌼𐌹𐌺, 𐌾𐌰𐌷 𐌺𐌰𐌽𐍄 𐌼𐌹𐌺; 𐌸𐌿 𐌺𐌰𐌽𐍄 𐍈𐌰𐌹𐍅𐌰 𐌲𐌰𐍃𐌹𐍄𐌰 𐌾𐌰𐌷 𐌿𐍂𐍂𐌴𐌹𐍃𐌰, 𐌸𐌿 𐍆𐍂𐍉𐍃𐍄 𐌼𐌹𐍄𐍉𐌽𐌹𐌼 𐌼𐌴𐌹𐌽𐌰𐌹𐌼 𐍆𐌰𐌹𐍂𐍂𐌰𐌸𐍂𐍉.
𐍃𐍄𐌰𐌹𐌲𐌰 𐌼𐌴𐌹𐌽𐌰 𐌾𐌰𐌷 𐌱𐌰𐌳𐌹 𐌼𐌴𐌹𐌽 𐌿𐍃𐍃𐍉𐌺𐌹𐌳𐌴𐍃 𐌾𐌰𐌷 𐌰𐌻𐌻𐌰𐌽𐍃 𐍅𐌹𐌲𐌰𐌽𐍃 𐌼𐌴𐌹𐌽𐌰𐌽𐍃 𐍆𐌰𐌿𐍂𐌰𐍅𐌹𐍃𐍃𐌴𐍃, 𐌿𐌽𐍄𐌴 𐌽𐌹𐍃𐍄 𐌻𐌹𐌿𐍄𐌴𐌹 𐌹̈𐌽 𐍄𐌿𐌲𐌲𐍉𐌽 𐌼𐌴𐌹𐌽𐌰𐌹.
𐍃𐌰𐌹, 𐍆𐍂𐌰𐌿𐌾𐌰, 𐌸𐌿 𐌺𐌰𐌽𐍄 𐌰𐌻𐌻𐌰, 𐌸𐍉 𐌰𐍆𐍄𐌿𐌼𐌹𐍃𐍄𐍉𐌽𐌰 𐌾𐌰𐌷 𐌸𐍉 𐍆𐍂𐌿𐌼𐌹𐍃𐍄𐍉𐌽𐌰; 𐌸𐌿 𐌲𐌰𐌳𐌰𐌹𐌷𐍄 𐌼𐌹𐌺 𐌾𐌰𐌷 𐌲𐌰𐌻𐌰𐌲𐌹𐌳𐌴𐍃 𐌰𐌽𐌰 𐌼𐌹𐍃 𐌷𐌰𐌽𐌳𐌿 𐌸𐌴𐌹𐌽𐌰.
𐍃𐌹𐌻𐌳𐌰𐌻𐌴𐌹𐌺 𐌹̈𐍃𐍄 𐌺𐌿𐌽𐌸𐌹 𐌸𐌴𐌹𐌽 𐌼𐌹𐍃; 𐌹̈𐍃𐍄 𐌲𐌰𐍃𐍅𐌹𐌽𐌸𐌹𐌳𐌰, 𐌹̈𐌺 𐌽𐌹 𐌼𐌰𐌲 𐌰𐌻𐌻𐌹𐍃 𐌳𐌿 𐌹̈𐌼𐌼𐌰 𐌲𐌰𐍃𐌽𐌹𐍅𐌰𐌽.
𐍈𐌰𐌸 𐌲𐌰𐌲𐌲𐌰𐌿 𐌰𐍆 𐌰𐌷𐌼𐌹𐌽 𐌸𐌴𐌹𐌽𐌰𐌼𐌼𐌰 𐌾𐌰𐌷 𐌰𐍆 𐌰𐌽𐌳𐍅𐌰𐌹𐍂𐌸𐌾𐌰 𐌸𐌴𐌹𐌽𐌰𐌼𐌼𐌰 𐍈𐌰𐌸 𐌸𐌻𐌹𐌿𐌷𐌰𐌿?
𐌾𐌰𐌱𐌰𐌹 𐌿𐍃𐍃𐍄𐌴𐌹𐌲𐌰𐌿 𐌹̈𐌽 𐌷𐌹𐌼𐌹𐌽, 𐌸𐌿 𐌹̈𐍃 𐌸𐌰𐍂; 𐌾𐌰𐌱𐌰𐌹 𐌰𐍄𐍃𐍄𐌴𐌹𐌲𐌰𐌿 𐌹̈𐌽 𐌷𐌰𐌻𐌾𐌰, 𐌰𐍄𐌹𐍃; 𐌾𐌰𐌱𐌰𐌹 𐌽𐌹𐌼𐌰𐌿 𐍆𐌹𐌸𐍂𐌰𐌺𐌰𐌽𐍃 𐌼𐌴𐌹𐌽𐌰𐌽𐍃 𐌰𐍄 𐌿𐌷𐍄𐍅𐍉𐌽, 𐌾𐌰𐌷 𐌱𐌰𐌿𐌰𐌿 𐌹̈𐌽 𐌰𐌽𐌳𐌾𐌰𐌼 𐌼𐌰𐍂𐌴𐌹𐌽𐍃, 𐌾𐌰𐌷 𐌰𐌿𐌺 𐌾𐌰𐌹𐌽𐌰𐍂 𐌷𐌰𐌽𐌳𐌿𐍃 𐌸𐌴𐌹𐌽𐌰 𐍄𐌹𐌿𐌷𐌹𐌸 𐌼𐌹𐌺, 𐌾𐌰𐌷 𐌲𐌰𐌷𐌰𐌱𐌰𐌹𐌸 𐌼𐌹𐌺 𐍄𐌰𐌹𐌷𐍃𐍅𐌰 𐌸𐌴𐌹𐌽𐌰.
𐌾𐌰𐌷 𐌹̈𐌺 𐌵𐌰𐌸, 𐌸𐌰𐌽𐌽𐌿 𐍂𐌹𐌵𐌹𐍃 𐌲𐌰𐍄𐍂𐌿𐌳𐌹𐌸 𐌼𐌹𐌺, 𐌾𐌰𐌷 𐌽𐌰𐌷𐍄𐍃 𐍅𐌰𐌹𐍂𐌸𐌹𐌸 𐌻𐌹𐌿𐌷𐌰𐌸 𐌹̈𐌽 𐌱𐍉𐍄𐍉𐍃 𐌼𐌴𐌹𐌽𐌰𐌹𐌶𐍉𐍃; 𐌿𐌽𐍄𐌴 𐍂𐌹𐌵𐌹𐍃 𐌽𐌹 𐍅𐌰𐌹𐍂𐌸𐌹𐌸 𐍂𐌹𐌵𐌹𐍃 𐍆𐍂𐌰𐌼 𐌸𐌿𐍃, 𐌾𐌰𐌷 𐌽𐌰𐌷𐍄𐍃 𐍅𐌰𐌹𐍂𐌸𐌹𐌸 𐌱𐌰𐌹𐍂𐌷𐍄𐍃 𐍃𐍅𐌴 𐌳𐌰𐌲𐍃; 𐍃𐍅𐌰𐍃𐍅𐌴 𐌸𐌰𐍄𐌰 𐍂𐌹𐌵𐌹𐍃 𐌹̈𐌶𐍉𐍃, 𐍃𐍅𐌰𐌷 𐌸𐌰𐍄𐌰 𐌻𐌹𐌿𐌷𐌰𐌸 𐌹̈𐌶𐍉𐍃.
𐌿𐌽𐍄𐌴 𐌸𐌿 𐌲𐌰𐍃𐍄𐌰𐌹𐍃𐍄𐌰𐌻𐍃𐍄 𐌻𐌿𐌽𐌳𐌾𐌰 𐌼𐌴𐌹𐌽𐌰; 𐍆𐍂𐌰𐌿𐌾𐌰, 𐌷𐌻𐌴𐌹𐌱𐌹𐌳𐌴𐍃 𐌼𐌹𐍃 𐌿𐍃 𐍅𐌰𐌼𐌱𐌰𐌹 𐌰𐌹𐌸𐌴𐌹𐌽𐍃 𐌼𐌴𐌹𐌽𐌰𐌹𐌶𐍉𐍃.
𐌰𐍅𐌹𐌻𐌹𐌿𐌳𐍉 𐌸𐌿𐍃, 𐌿𐌽𐍄𐌴 𐍉𐌲𐌾𐌰𐌽𐌳𐍃 𐍃𐌹𐌻𐌳𐌰𐌻𐌴𐌹𐌺𐌽𐌹𐍃; 𐍃𐌹𐌻𐌳𐌰𐌻𐌴𐌹𐌺𐌰𐌹 𐍃𐌹𐌽𐌳 𐍅𐌰𐌿𐍂𐍃𐍄𐍅𐌰𐌽𐍃 𐌸𐌴𐌹𐌽𐌰𐌹, 𐌾𐌰𐌷 𐍃𐌰𐌹𐍅𐌰𐌻𐌰 𐌼𐌴𐌹𐌽𐌰 𐍅𐌰𐌹𐍄 𐌰𐌱𐍂𐌰𐌱𐌰.
𐌲𐌰𐍆𐌿𐌻𐌲𐌹𐌽 𐌽𐌹𐍃𐍄 𐌱𐌰𐌹𐌽 𐌼𐌴𐌹𐌽 𐍆𐍂𐌰𐌼 𐌸𐌿𐍃, 𐌸𐌰𐍄𐌴𐌹 𐌲𐌰𐍅𐌰𐌿𐍂𐌷𐍄𐌴𐍃 𐌸𐌹𐌿𐌱𐌾𐍉, 𐌾𐌰𐌷 𐍃𐍄𐍉𐌼𐌰 𐌼𐌴𐌹𐌽𐍃 𐌹̈𐌽 𐌿𐌽𐌳𐌰𐍂𐌹𐍃𐍄𐌹𐌽 𐌰𐌹𐍂𐌸𐍉𐍃; 𐌿𐌽𐌲𐌰𐌷𐌰𐌱𐌰𐌹𐌸𐌰𐌽𐌰 𐌼𐌴𐌹𐌽𐌰𐌽𐌰 𐍅𐌹𐍄𐌿𐌽 𐌰𐌿𐌲𐍉𐌽𐌰 𐌸𐌴𐌹𐌽𐌰, 𐌾𐌰𐌷 𐌹̈𐌽 𐌱𐍉𐌺𐍉𐌼 𐌸𐌴𐌹𐌽𐌰𐌹𐌼 𐌰𐌻𐌻𐌰𐌹 𐌲𐌰𐌼𐌴𐌻𐌾𐌰𐌽𐌳𐌰; 𐌳𐌰𐌲𐌹𐍃 𐌲𐌰𐌳𐌹𐌲𐌰𐌽𐌳𐌰 𐌾𐌰𐌷 𐌽𐌹 𐌰𐌹𐌽𐍃𐌷𐌿𐌽 𐌹̈𐌽 𐌹̈𐌼.
𐌼𐌹𐍃 𐌰𐌿𐌺 𐍆𐌹𐌻𐌿 𐍃𐍅𐌴𐍂𐌰𐌹 𐍃𐌹𐌽𐌳 𐍆𐍂𐌹𐌾𐍉𐌽𐌳𐍃 𐌸𐌴𐌹𐌽𐌰𐌹, 𐌲𐌿𐌸, 𐍆𐌹𐌻𐌿 𐌲𐌰𐍃𐍅𐌹𐌽𐌸𐌹𐌳𐌰 𐍃𐌹𐌽𐌳 𐍂𐌴𐌹𐌺𐌾𐌰 𐌹̈𐌶𐌴; 𐌲𐌰𐍂𐌰𐌸𐌾𐌰 𐌹̈𐌽𐍃, 𐌾𐌰𐌷 𐌿𐍆𐌰𐍂 𐌼𐌰𐌻𐌼𐌰𐌽 𐌼𐌰𐌽𐌰𐌲𐌽𐍉𐌳𐌴𐌳𐌿𐌽; 𐌿𐍂𐍂𐌰𐌹𐍃𐌹𐌸𐍃 𐌾𐌰𐌷 𐌽𐌰𐌿𐌷 𐌹̈𐌼 𐌼𐌹𐌸 𐌸𐌿𐍃.
𐌾𐌰𐌱𐌰𐌹 𐌿𐍃𐌵𐌹𐌼𐌰𐌹𐍃 𐍆𐍂𐌰𐍅𐌰𐌿𐍂𐌷𐍄𐌰𐌹𐌼, 𐌲𐌿𐌸, 𐌼𐌰𐌽𐌽𐌰𐌽𐍃 𐌱𐌻𐍉𐌸𐌹𐍃, 𐌰𐍆𐍅𐌰𐌽𐌳𐌴𐌹𐌸 𐌰𐍆 𐌼𐌹𐍃, 𐌿𐌽𐍄𐌴 𐌼𐌹𐌸 𐍅𐌰𐌹𐌷𐌾𐍉𐌽 𐍃𐌹𐌾𐌿𐌸 𐌱𐌹 𐌼𐌹𐍄𐍉𐌽𐌹𐌽𐍃; 𐌽𐌹𐌼𐌰𐌽𐌳 𐌹̈𐌽 𐌿𐍃𐍅𐌹𐍃𐍃𐌾𐌰 𐌱𐌰𐌿𐍂𐌲𐍃 𐌸𐌴𐌹𐌽𐌰.
𐌽𐌹𐌿 𐌸𐌰𐌽𐍃 𐍆𐌹𐌾𐌰𐌽𐌳𐌰𐌽𐍃 𐌸𐌿𐌺, 𐍆𐍂𐌰𐌿𐌾𐌰, 𐍆𐌹𐌾𐌰𐌹𐌳𐌰 𐌾𐌰𐌷 𐌹̈𐌽 𐍆𐌹𐌰𐌽𐌳𐌴 𐌸𐌴𐌹𐌽𐌰𐌹𐌶𐌴 𐌲𐌰𐌿𐍂𐌹𐌸𐍃? 𐍆𐌿𐌻𐌻𐌰𐌹 𐍆𐌹𐌾𐌰𐌸𐍅𐌰𐌹 𐍆𐌹𐌾𐌰 𐌹̈𐌽𐍃, 𐍆𐌹𐌾𐌰𐌽𐌳𐍃 𐍅𐌰𐌿𐍂𐌸𐌿𐌽 𐌼𐌹𐍃.
𐌲𐌰𐌺𐌹𐌿𐍃 𐌼𐌹𐌺, 𐌲𐌿𐌸, 𐌺𐌿𐌽𐌽𐌴𐌹𐍃 𐌷𐌰𐌹𐍂𐍄𐍉 𐌼𐌴𐌹𐌽, 𐌿𐍃𐍃𐍉𐌺𐌴𐌹 𐌼𐌹𐌺 𐌾𐌰𐌷 𐌺𐌿𐌽𐌽𐌴𐌹𐍃 𐍃𐍄𐌰𐌹𐌲𐍉𐍃 𐌼𐌴𐌹𐌽𐍉𐍃. 𐌾𐌰𐌷 𐍃𐌰𐌹𐍈, 𐌾𐌰𐌿 𐍅𐌹𐌲𐍃 𐌿𐌽𐌲𐌰𐍂𐌰𐌹𐌷𐍄𐌴𐌹𐌽𐍃 𐌹̈𐌽 𐌼𐌹𐍃, 𐌾𐌰𐌷 𐍄𐌹𐌿𐌷 𐌼𐌹𐌺 𐌹̈𐌽 𐍅𐌹𐌲𐌰 𐌰𐌹𐍅𐌴𐌹𐌽𐌰𐌼𐌼𐌰.

𐍀𐍃𐌰𐌻𐌼𐍉 ·𐍂𐌻𐌷· 𐌹̈𐌽 𐍂𐌰𐌶𐌳𐌰𐌹 𐌲𐌿𐍄𐌹𐍃𐌺𐌰𐌹, 𐍃𐌺𐌴𐌹𐍂𐌴𐌹𐌽𐍃 𐍆𐍂𐌰𐌼 𐌹̈𐍉𐍃𐍄𐌰𐌹𐌷𐌰 (·𐌱:𐌺𐌵·).

LXX Psalm 138 (MT 139) in the Gothic language, a translation by 2sh (2026).