𐌷𐌰𐌹𐍂𐌳𐌴𐌹𐍃 𐌻𐌹𐌿𐍄𐍃

𐌰𐌽𐌰 𐍃𐍄𐌰𐌳𐌰 𐌷𐌰𐌿𐌷𐌰𐌼𐌼𐌰, 𐍅𐌰𐍃 𐌼𐌰𐌲𐌿𐍃 𐌾𐌿𐌲𐌲𐍃 𐍅𐌹𐍄𐌰𐌽𐌳𐍃 𐌿𐍆𐌰𐍂𐍉 𐌷𐌰𐌹𐍂𐌳𐌰𐌹 𐌰𐍅𐌴 𐌹𐌽 𐌲𐌰𐍅𐌰𐌹𐍂𐌸𐌾𐌰. 𐌳𐌰𐌲𐌰 𐍈𐌰𐌼𐌼𐌴𐌷 𐌽𐌹 𐌼𐌰𐌷𐍄𐌰 𐌹𐌽 𐍅𐌰𐌹𐌷𐍄𐌰𐌹 𐍆𐌰𐌲𐌹𐌽𐍉𐌽, 𐌽𐌹𐌱𐌰𐌹 𐌴𐌹 𐌳𐌿 𐌷𐌿𐌽𐌳𐌰 𐍃𐌴𐌹𐌽𐌰𐌼𐌼𐌰 𐌵𐌰𐌸 𐌰𐌹𐌸𐌸𐌰𐌿 𐍃𐍅𐌹𐌲𐌻𐌰𐌹 𐌷𐌰𐌹𐍂𐌳𐌴𐌹𐍃 𐍃𐌴𐌹𐌽𐌰𐌹 𐌻𐌹𐌿𐌸𐍉𐌳𐌰. 𐌾𐌰𐌷 𐍃𐌿𐌽𐍃 𐍅𐌰𐍂𐌸 𐌹𐌽 𐌿𐌽𐌻𐌿𐍃𐍄𐌰𐌿; 𐍃𐍉 𐌻𐌹𐌱𐌰𐌹𐌽𐍃 𐌰𐌽𐌰 𐌸𐌹𐌶𐌰𐌹 𐍅𐌹𐌽𐌾𐌰𐌹 𐍅𐌰𐍂𐌸 𐌰𐍆𐌼𐍉𐌾𐌰𐌽𐌳𐌴𐌹 𐍆𐌹𐌻𐌿.

𐌹𐌽𐌿𐌷 𐌸𐌹𐍃 𐌽𐌿 𐌸𐌰𐌷𐍄𐌰 𐍃𐌹𐍃 𐌻𐌹𐍃𐍄 𐍃𐍉𐌴𐌹 𐌹𐌽𐌰 𐍆𐌰𐌷𐌴𐌳𐌰𐌹𐍃 𐍆𐌿𐌻𐌻𐌾𐌰𐌹. 𐍃𐍅𐌰𐌻𐌴𐌹𐌺𐌰𐌹 𐍃𐍄𐌹𐌱𐌽𐌰𐌹 𐌼𐌹𐌺𐌹𐌻𐌰𐌹 𐌿𐍆𐍅𐍉𐍀𐌹𐌳𐌰, 𐌴𐌹 𐍃𐍉 𐌿𐌽𐌳 𐌽𐌴𐍈𐌰 𐌷𐌰𐌹𐌼 𐌲𐌰𐌷𐌰𐌿𐍃𐌹𐌳𐌰 𐍅𐌰𐍂𐌸: “𐍅𐌿𐌻𐍆𐍃! 𐍅𐌿𐌻𐍆𐍃!” 𐌸𐌰𐌽𐌽𐌿 𐌽𐌿 𐌾𐌰𐌹, 𐌼𐌰𐌽𐍃 𐌽𐌹 𐌸𐌰𐌽𐌰𐍃𐌴𐌹𐌸𐍃 𐌰𐍂𐌱𐌰𐌹𐌳𐌹𐌳𐌴𐌳𐌿𐌽 𐌾𐌰𐌷 𐍂𐌿𐌽𐌽𐌿𐌽 𐌹𐌽 𐌰𐌻𐌾𐌰𐌽𐌰 𐌳𐌿 𐌸𐌹𐌶𐌰𐌹 𐍅𐌹𐌽𐌾𐌰𐌹. 𐌰𐌺𐌴𐌹 𐌾𐌰𐌹𐌽𐌰, 𐍃𐌿𐌽𐍃𐌴𐌹 𐌵𐌴𐌼𐌿𐌽, 𐌱𐌹𐌲𐌴𐍄𐌿𐌽 𐌸𐌰𐌽𐌰 𐌼𐌰𐌲𐌿 𐌹𐌽 𐌷𐌻𐌰𐍃𐌴𐌹𐌽 𐌱𐌹𐌻𐌰𐌹𐌺𐌰𐌽𐌳𐌰𐌽 𐌹𐌽𐍃.

𐌰𐍆𐌰𐍂 𐌽𐌹 𐌼𐌰𐌽𐌰𐌲𐌰𐌽𐍃 𐌳𐌰𐌲𐌰𐌽𐍃 𐍃𐌰 𐌼𐌰𐌲𐌿𐍃 𐌰𐍆𐍄𐍂𐌰 𐌿𐍆𐍅𐍉𐍀𐌹𐌳𐌰: “𐍅𐌿𐌻𐍆𐍃! 𐍅𐌿𐌻𐍆𐍃!” 𐌾𐌰𐌷 𐌰𐍆𐍄𐍂𐌰 𐌸𐌰𐌹 𐌼𐌰𐌽𐍃 𐍂𐌿𐌽𐌽𐌿𐌽 𐌴𐌹 𐌷𐌹𐌻𐍀𐌰𐌹𐌽𐌰 𐌹𐍃, 𐌰𐌺𐌴𐌹 𐌰𐍆𐍄𐍂𐌰 𐌱𐌹𐌻𐌰𐌹𐌺𐌰𐌽𐌰𐌹 𐍅𐌴𐍃𐌿𐌽.

𐌹𐌸 𐌸𐌰𐌽 𐍃𐌿𐌼𐌰𐌼𐌼𐌰 𐌳𐌰𐌲𐌰, 𐌰𐌿𐍆𐍄𐍉 𐍅𐌿𐌻𐍆𐍃 𐌵𐌰𐌼 𐌾𐌰𐌷 𐌳𐌹𐍃𐌳𐍂𐌰𐌿𐍃 𐌸𐍉𐍃 𐌰𐍅𐌹𐌽𐍃. 𐌽𐌿 𐍆𐌿𐌻𐌻𐌹𐌸𐍃 𐌰𐌲𐌹𐍃𐌹𐍃, 𐍃𐌰 𐌼𐌰𐌲𐌿𐍃 𐍂𐌰𐌽𐌽 𐌳𐌿 𐌸𐌹𐌶𐌰𐌹 𐌷𐌰𐌹𐌼𐌰𐌹 𐌰𐍆𐍄𐍂𐌰 𐌿𐍆𐍅𐍉𐍀𐌾𐌰𐌽𐌳𐍃: “𐍅𐌿𐌻𐍆𐍃! 𐍅𐌿𐌻𐍆𐍃!” 𐌰𐌺𐌴𐌹 𐌸𐌰𐌹 𐌼𐌰𐌽𐍃, 𐌸𐌰𐌹𐌴𐌹 𐍄𐍅𐌰𐌹𐌼 𐍃𐌹𐌽𐌸𐌰𐌼 𐍆𐌰𐌿𐍂𐌰 𐌰𐍆𐌰𐌹𐍂𐌶𐌹𐌳𐌰𐌹 𐍅𐌴𐍃𐌿𐌽, 𐌷𐌰𐌿𐍃𐌹𐌳𐌴𐌳𐌿𐌽 𐌸𐌰𐌽𐍃 𐌷𐍂𐍉𐍀𐍉𐍃, 𐌹𐌸 𐌽𐌹 𐌰𐌹𐌽𐍃𐌷𐌿𐌽 𐍅𐌰𐍂𐌸 𐌲𐌰𐍅𐌰𐌲𐌹𐌸𐍃 𐌳𐌿 𐌷𐌹𐌻𐍀𐌰𐌽 𐌹𐍃 𐍃𐍅𐌴 𐍆𐌰𐌿𐍂𐌰. 𐍃𐌰 𐍅𐌿𐌻𐍆𐍃 𐌳𐌰𐌿𐌸𐌹𐌳𐌰 𐌾𐌰𐌷 𐍆𐍂𐌴𐍄 𐌼𐌰𐌽𐌰𐌲𐌴𐌹𐌽𐍃 𐍆𐌹𐌻𐌿 𐌰𐍅𐌴 𐌼𐌰𐌲𐌰𐌿𐍃 𐌾𐌰𐌷 𐌸𐌰𐌽 𐍃𐌻𐌰𐌿𐍀 𐌹𐌱𐌿𐌺𐌰𐌹 𐌹𐌽 𐍅𐌰𐌻𐌸𐌿.

𐌽𐌹 𐌲𐌰𐌻𐌰𐌿𐌱𐌾𐌰𐌳𐌰 𐌻𐌹𐌿𐌲𐌽𐌾𐌰, 𐌸𐌰𐌿𐌷𐌾𐌰𐌱𐌰𐌹 𐌵𐌹𐌸𐌰𐌹 𐍃𐌿𐌽𐌾𐌰.

𐌷𐌰𐌹𐍂𐌳𐌴𐌹𐍃 𐌻𐌹𐌿𐍄𐍃 𐌹𐌽 𐍂𐌰𐌶𐌳𐌰𐌹 𐌲𐌿𐍄𐌹𐍃𐌺𐌰𐌹, 𐍃𐌺𐌴𐌹𐍂𐌴𐌹𐌽𐍃 𐍆𐍂𐌰𐌼 𐌹𐍉𐌷𐌰𐌽𐌽𐌴𐍃 𐌷𐌰𐌲𐌲𐍅𐌹𐌸𐍉𐍃 (·͵𐌱𐌺𐌵·).

The Boy Who Cried Wolf in the Gothic language, a translation by 2sh (2026).