𐌰𐌹𐍂𐌼𐌿𐌽𐌰𐌲𐌹𐌻𐌳𐍃 𐍃𐌰 𐌲𐌿𐍄𐌰 𐌼𐌰𐍂𐍄𐍅𐍂 𐌷𐌹𐍃𐍀𐌰𐌽𐌾𐍉𐍃

𐌳𐌰𐌲𐍃 𐌲𐌰𐌼𐌹𐌽𐌸𐌾𐌹𐍃: ·𐌰· 𐌽𐌰𐌿𐌱𐌰𐌹𐌼𐌱𐌰𐌹𐍂 (𐌰𐌹𐌺𐌺𐌻𐌴𐍃𐌾𐍉 𐌰𐌿𐍂𐌸𐌰𐌿𐌳𐌰𐌿𐌺𐍃𐌴𐌹𐌽𐌰 𐌰𐌿𐍃𐍄𐍂𐌰), ·𐌹𐌲· 𐌰𐍀𐍂𐌴𐌹𐌻𐍃 (𐌰𐌹𐌺𐌺𐌻𐌴𐍃𐌾𐍉𐌽𐍃 𐍅𐌹𐍃𐍄𐍂𐍉𐍃)

𐌲𐌰𐍅𐌰𐌿𐍂𐌳𐌾𐌴 𐌲𐍂𐌴𐌲𐌰𐌿𐍂𐌾𐌰𐌿𐍃 𐍅𐌴𐌹𐌷𐌹𐍃 𐌱𐍉𐌺𐌰 ·𐌲·, 𐌷𐌰𐌿𐌱𐌹𐌸 ·𐌻𐌰·

𐍃𐍅𐌴 𐌼𐌰𐌽𐌰𐌲𐌰𐌹𐌶𐌴, 𐌸𐌰𐌹𐌴𐌹 𐍆𐍂𐌰𐌼 𐌳𐌰𐌹𐌻𐌹𐌼 𐌷𐌹𐍃𐍀𐌰𐌽𐌾𐍉𐍃 𐌵𐌴𐌼𐌿𐌽, 𐌲𐌰𐌷𐌰𐌿𐍃𐌾𐌰𐌽𐌳𐍃 𐌿𐍆𐌺𐌿𐌽𐌸𐌰, 𐌽𐌹𐌿𐌾𐌰𐌻𐌴𐌹𐌺𐍉 𐌰𐌹𐍂𐌼𐌿𐌽𐌰𐌲𐌹𐌻𐌳𐍃 𐌸𐌹𐌿𐌳𐌰𐌽𐍃 𐍃𐌿𐌽𐌿𐍃 𐌻𐌹𐌿𐌱𐌰𐌲𐌹𐌻𐌳𐌹𐍃 𐌸𐌹𐌿𐌳𐌰𐌽𐌹𐍃 𐍅𐌹𐍃𐌹𐌲𐌿𐍄𐌰𐌽𐌴, 𐌲𐌰𐍅𐌰𐌽𐌳𐌴𐌹𐌸 𐍃𐌹𐌺 𐍆𐍂𐌰𐌼 𐌰𐌹𐍂𐌶𐌴𐌹𐌽 𐌰𐍂𐌹𐌰𐌽𐌹𐍃𐌺𐌰𐌹 𐌳𐌿 𐌲𐌰𐌻𐌰𐌿𐌱𐌴𐌹𐌽𐌰𐌹 𐌺𐌰𐌸𐌰𐌿𐌻𐌴𐌹𐌲𐌰𐌹 𐌸𐌰𐌹𐍂𐌷 𐌼𐌰𐌽𐌽𐌰𐌽 𐌲𐌰𐌰𐌹𐍃𐍄𐌰𐌹𐌳𐌰𐌽𐌰 𐌼𐌰𐌹𐍃𐍄𐌰𐌽𐌰 𐌻𐌰𐌹𐌰𐌽𐌳𐍂𐌿 𐌰𐌹𐍀𐌹𐍃𐌺𐌰𐌿𐍀𐌿 𐍃𐌴𐌱𐌹𐌻𐌻𐌰𐍃, 𐍆𐌰𐌿𐍂𐌰 𐌼𐌰𐌿𐍂𐌲𐌰𐌿 𐌼𐌹𐍃 𐌹̈𐌽 𐍆𐍂𐌹𐌾𐌰𐌸𐍅𐌰𐌹 𐌻𐌹𐌿𐌱𐌰𐌻𐌴𐌹𐌺𐍉 𐌲𐌰𐍅𐌹𐌳𐌰𐌽𐌰, 𐌼𐌴𐍂𐌾𐌰𐌽𐌳𐌰𐌽. 𐌹̈𐌼𐌼𐌰 𐍃𐌰 𐌰𐍄𐍄𐌰 𐌰𐍂𐌹𐌰𐌽𐌹𐍃𐌺𐌰, 𐌳𐌿𐌸𐌴 𐌴𐌹 𐍃𐌹𐌺 𐌳𐌿 𐍃𐌰𐌼𐍉𐌽 𐌰𐌹𐍂𐌶𐌴𐌹𐌽 𐌰𐍄𐍅𐌰𐌽𐌳𐌾𐌰𐌹, 𐌻𐌰𐌿𐌽𐌰𐌼 𐍆𐌿𐌻𐌻𐌰𐍅𐌴𐌹𐍃𐌾𐌰𐌽 𐌾𐌰𐌷 𐍈𐍉𐍄𐍉𐌼 𐌹𐌽𐌰𐌲𐌾𐌰𐌽 𐍃𐍉𐌺𐌹𐌳𐌰. 𐌹̈𐌸 𐌱𐌹𐌸𐌴 𐌿𐌽𐍃𐍅𐌴𐌹𐌱𐌰𐌽𐌳𐍃 𐌰𐌽𐌳𐌷𐍉𐍆, 𐌴𐌹 𐌸𐍉 𐌲𐌰𐌻𐌰𐌿𐌱𐌴𐌹𐌽 𐍃𐌿𐌽𐌾𐍉𐌽 𐌽𐌹 𐌰𐌹𐍅 𐌱𐌹𐌻𐌴𐌹𐌸𐌰𐌽 𐌼𐌰𐌷𐍄𐌴𐌳𐌹, 𐌸𐍉𐌴𐌹 𐍃𐌿𐌼𐌰𐌽 𐌿𐍆𐌺𐌿𐌽𐌸𐌴𐌳𐌹, 𐍃𐌰 𐌰𐍄𐍄𐌰 𐌸𐍅𐌰𐌹𐍂𐌷𐍃 𐌱𐌹𐌽𐌰𐌼 𐌰𐍆 𐌹𐌼𐌼𐌰 𐌸𐌹𐌿𐌳𐌹𐌽𐌰𐍃𐍃𐌿 𐌾𐌰𐌷 𐌱𐌹𐍂𐌰𐌿𐌱𐍉𐌳𐌰 𐌰𐌻𐌻𐌰 𐌰𐌹𐌲𐌹𐌽𐌰. 𐌾𐌰𐌽’𐌽𐌹 𐍃𐍅𐌰 𐌼𐌰𐌷𐍄𐌴𐌳𐌹 𐌲𐍉𐌳𐌴𐌹𐌽 𐍆𐍂𐌰𐌸𐌾𐌹𐍃 𐌹̈𐍃 𐍅𐌰𐌹𐌺𐌾𐌰𐌽, 𐌲𐌰𐌻𐌰𐌲𐌾𐌰𐌽𐌳𐍃 𐌹̈𐌽𐌰 𐌹̈𐌽 𐌺𐌰𐍂𐌺𐌰𐍂𐌰 𐌷𐌰𐍂𐌳𐌾𐌰, 𐌲𐌰𐌱𐌰𐌽𐌳 𐌱𐌹 𐌷𐌰𐌻𐍃𐌰𐌲𐌲𐌰𐌽 𐌾𐌰𐌷 𐌷𐌰𐌽𐌳𐌿𐌽𐍃 𐌹̈𐍃 𐌴𐌹𐍃𐌰𐍂𐌽𐌰𐌼. 𐍃𐍅𐌰𐌷 𐌰𐌽𐌰𐍃𐍄𐍉𐌳𐌹𐌳𐌰 𐌰𐌹𐍂𐌼𐌿𐌽𐌰𐌲𐌹𐌻𐌳𐍃 𐍃𐌰 𐌸𐌹𐌿𐌳𐌰𐌽𐍃 𐌾𐌿𐌲𐌲𐌰 𐌸𐌹𐌿𐌳𐌰𐌽𐌲𐌰𐍂𐌳𐌾𐌰 𐌰𐌹𐍂𐌸𐌴𐌹𐌽𐌰 𐍆𐍂𐌰𐌺𐌿𐌽𐌽𐌰𐌽, 𐌹̈𐌽 𐍃𐌰𐌺𐌺𐌰𐌿 𐌲𐌰𐌱𐌿𐌽𐌳𐌰𐌽𐍃 𐌻𐌹𐌲𐌰𐌽, 𐌲𐌿𐌳𐌰 𐌰𐌻𐌻𐍅𐌰𐌻𐌳𐌰𐌽𐌳 𐌳𐌿 𐌲𐌰𐍃𐍅𐌹𐌽𐌸𐌽𐌰𐌽 𐌱𐌹𐌳𐍉𐍃 𐌿𐍃𐌲𐌹𐌿𐍄𐌰𐌽, 𐌾𐌰𐌷 𐍆𐌹𐌻𐌿 𐌼𐌰𐌹𐍃 𐌷𐌰𐌿𐌷𐌰𐌱𐌰 𐍅𐌿𐌻𐌸𐌿 𐌰𐌹𐍂𐌸𐍉𐍃 𐍈𐌴𐌹𐌻𐌰𐍈𐌰𐌹𐍂𐌱𐌰𐌹𐌶𐍉𐍃 𐍆𐍂𐌰𐌺𐌿𐌽𐌽𐌰𐌽, 𐌿𐌽𐌳 𐍈𐌰𐌽 𐍆𐌹𐌻𐌿 𐌹̈𐍃 𐌲𐌰𐌱𐌿𐌽𐌳𐌰𐌽𐍃 𐍆𐍂𐍉𐌸 𐌴𐌹 𐌽𐌹 𐍅𐌴𐍃𐌹 𐌸𐌰𐍄𐌴𐌹 𐌼𐌰𐌷𐍄𐌴𐌳𐌹 𐌰𐍆𐌽𐌿𐌼𐌰𐌽 𐍅𐌰𐌹𐍂𐌸𐌰𐌽.

𐌰𐌸𐌸𐌰𐌽 𐌸𐌰𐌽 𐌵𐌰𐌼 𐌳𐌰𐌲𐍃 𐌳𐌿𐌻𐌸𐌰𐌹𐍃 𐍀𐌰𐍃𐌺𐌰, 𐌹̈𐌽 𐌸𐌰𐌷𐌰𐌹𐌽𐌰𐌹 𐍂𐌹𐌵𐌹𐌶𐌹𐍃 𐌽𐌰𐌷𐍄𐍃 𐌹𐌽𐍃𐌰𐌽𐌳𐌹𐌳𐌰 𐍃𐌰 𐌷𐌹𐌽𐌳𐌰𐍂𐍅𐌴𐌹𐍃 𐌰𐍄𐍄𐌰 𐌰𐌹𐍀𐌹𐍃𐌺𐌰𐌿𐍀𐌿 𐌰𐍂𐌹𐌰𐌽𐌹𐍃𐌺𐌰𐌽𐌰 𐌳𐌿 𐌹̈𐌼𐌼𐌰, 𐌳𐌿𐌸𐌴 𐌿𐍃 𐌷𐌰𐌽𐌳𐌰𐌿 𐌹̈𐍃 𐌲𐌰𐌼𐌰𐌹𐌽𐌳𐌿𐌸 𐌲𐌰𐍅𐌴𐌹𐌷𐌰𐌹𐌽𐌰𐌹𐍃 𐌿𐌽𐌰𐌹𐍂𐌺𐌽𐌰𐌹𐌶𐍉𐍃 𐌰𐌽𐌳𐌽𐌴𐌼𐌹, 𐌴𐌹𐌸𐌰𐌽 𐌸𐌰𐌹𐍂𐌷 𐌸𐌰𐍄𐌰 𐌰𐍆𐍄𐍂𐌰 𐌰𐌽𐍃𐍄 𐌰𐍄𐍄𐌹𐌽𐍃 𐌲𐌰𐌽𐌿𐍄𐌹. 𐌹̈𐌸 𐍃𐌰 𐌼𐌰𐌽𐌽𐌰, 𐍃𐌰𐌴𐌹 𐍃𐌹𐌺 𐌲𐌿𐌳𐌰 𐌰𐍄𐌲𐌰𐍆, 𐍆𐌰𐌹𐍂𐌹𐌽𐍉𐌳𐌰 𐌸𐌰𐌽𐌰 𐌽𐌴𐍈𐌾𐌰𐌽𐌳𐌰𐌽 𐌰𐌹𐍀𐌹𐍃𐌺𐌰𐌿𐍀𐌿 𐌰𐍂𐌹𐌰𐌽𐌹𐍃𐌺𐌰𐌽 𐍃𐍅𐌰𐍃𐍅𐌴 𐍃𐌺𐌿𐌻𐌳 𐍅𐌰𐍃, 𐌾𐌰𐌷 𐌰𐍆𐍃𐌺𐌰𐌿𐍆 𐌷𐌹𐌽𐌳𐌰𐍂𐍅𐌴𐌹𐍃𐌴𐌹𐌽 𐌹̈𐍃 𐌲𐌰𐍃𐌰𐌷𐍄𐌹𐌼 𐌲𐌰𐍄𐌹𐌻𐌰𐌹𐌼; 𐌿𐌽𐍄𐌴 𐌸𐌰𐌿𐌷𐌾𐌰𐌱𐌰𐌹 𐌿𐍄𐌰𐌽𐌰 𐌲𐌰𐌱𐌿𐌽𐌳𐌰𐌽𐍃 𐌻𐌰𐌲, 𐌰𐌹𐌸𐌸𐌰𐌿 𐌹̈𐌽𐌽𐌰 𐍃𐍄𐍉𐌸 𐌹̈𐌽 𐍃𐌹𐍃 𐍄𐌿𐌻𐌲𐌿𐌱𐌰 𐌹̈𐌽 𐌼𐌹𐌺𐌹𐌻 𐌰𐌿𐌷𐌿𐌼𐌹𐍃𐍄𐌹𐌽 𐍆𐍂𐌰𐌸𐌾𐌹𐍃 𐍃𐌴𐌹𐌽𐌹𐍃. 𐌱𐌹𐌸𐌴𐌷 𐌸𐌰𐌽 𐍃𐌰 𐌰𐌹𐍀𐌹𐍃𐌺𐌰𐌿𐍀𐌿𐍃 𐌲𐌰𐍅𐌰𐌽𐌳𐌹𐌳𐌰 𐍃𐌹𐌺, 𐍃𐌰 𐌰𐍄𐍄𐌰 𐌰𐍂𐌹𐌰𐌽𐌹𐍃𐌺𐌰 𐌰𐌿𐌷𐌾𐍉𐌳𐌰 𐌾𐌰𐌷 𐍃𐌿𐌽𐍃𐌰𐌹𐍅 𐌹𐌽𐍃𐌰𐌽𐌳𐌹𐌳𐌰 𐌰𐌽𐌳𐌱𐌰𐌷𐍄𐍉𐍃, 𐌸𐌰𐌹𐌴𐌹 𐌸𐌰𐌽𐌰 𐌸𐌰𐍂 𐌻𐌹𐌲𐌰𐌽𐌳𐌰𐌽 𐍄𐌿𐌻𐌲𐌹𐍃𐍄𐌰𐌽 𐌰𐌽𐌳𐌷𐌰𐌹𐍄𐌰𐌽𐌳 𐌲𐌿𐌳𐌹𐍃 𐌰𐍆𐍃𐌻𐍉𐌷𐌴𐌹𐌽𐌰, 𐌾𐌰𐌷 𐌸𐌰𐍄𐌰 𐍅𐌰𐍂𐌸. 𐌰𐌻𐌻𐌹𐍃 𐍃𐌿𐌽𐍃𐌴𐌹 𐌹𐌽𐌽𐌲𐌰𐌻𐌹𐌸𐌿𐌽, 𐌰𐌺𐌿𐌶𐌾𐌰 𐌹̈𐌽 𐌷𐌰𐌿𐌱𐌹𐌳𐌰 𐌹̈𐍃 𐌷𐌰𐍆𐍄𐌾𐌰𐌽𐌳𐌰𐌽𐍃 𐌱𐌹𐌽𐌴𐌼𐌿𐌽 𐌻𐌹𐌱𐌰𐌹𐌽 𐌻𐌴𐌹𐌺𐌴𐌹𐌽𐌰; 𐌾𐌰𐌷 ...

𐌰𐌹𐍂𐌼𐌰𐌽𐌰𐌲𐌹𐌻𐌳𐍃 𐍃𐌰 𐌲𐌿𐍄𐌰 𐌷𐌹𐍃𐍀𐌰𐌽𐌾𐍉𐍃 𐌹̈𐌽 𐍂𐌰𐌶𐌳𐌰𐌹 𐌲𐌿𐍄𐌹𐍃𐌺𐌰𐌹, 𐍃𐌺𐌴𐌹𐍂𐌴𐌹𐌽𐍃 𐍆𐍂𐌰𐌼 𐌹̈𐍉𐍃𐍄𐌰𐌹𐌷𐌰 (·𐌱:𐌺𐌴·-·𐌱:𐌺𐌵·).

Hermenegild the Goth of Spain in the Gothic language, a translation by 2sh (2025-2026).