26 Martyros Gutlandis in Krim

Dags gaminþjis: 26 Martjus

Bi 376 A.X., Aþanareiks þiudans gutisks warþ gramiþs saiƕands gakunnandans is andnimandein Xristeinein in wailamereinais Wulfilins Aipiskaupaus arianiskis. Swa, is anabauþ balwjan jah usqiman managana þize, ufta inuh kustu. Swaswe Sozaumainus spillawitubnareis gamelida:

“Unte biliþun haidu attane ize, Aþanareiks brahta managans in managos balweinins; sumans afdauþida afar þatei faur staua táuhanai waurþun jah garedaba andhaihaitun laisein, jah anþarai waurþun afslahanai jah uslaubidai ni wesun ain waurd sunjonais seinaizos rodjan. Qiþan ist þatei eis gasatidai fram Aþanareika du waurkjan ragina unmanariggwa seina, brāhtedun gatimrein leikis þatei gasatidedun ana wagna jah letand, ei ita du hleiþrom þize mundane swe andnumanai Xristeinein attauhan was, jah þaiei þata leik inweitan jah saljan anabudanai wesun; jabei þata ni wildedeina taujan, þai mans jah þos hleiþros gabrannido weseina. Iþ gahausida ei skaþis nauh maizane mikilduþais was in þamma mela gatawiþ. Managai ni wildedun jainaim andhausjan þaiei þaim hunsljan nauþidedun. In þaim wesun mans jah qinons; þizo sumos tauhun barna leitila seina, anþara fodidedun baurins niujans seinans ana brust; gaþlauhun in aikklesjon seina soei hleiþra was. Þai haiþnai inbrannidedun ita, jah alla wesun qistida.”

In funin mikilamma 308 þiudos fraqistnodedun, þizeei þatainei 21 bi namin gakunnanda, 2 gudjans, 1 monakus jah 18 gamainjans (11 mans, 7 qinons). Du þizai raþjon anaaukanda 5 barna Werekins jah Batwinis gudjane (2 sunjus jah 3 dauhtrjus). Þata warþ in Gutlanda in Krim.

In þaim was sums manna xristeins saei brahta hunslahlaibans du aikklesjon þaiei faura sauda aiwxaristiïns in Leiturgein Gudiska brūhtai weseina, iþ warþ fram gadrauhtim gafāhans sai nū, ni hunsla inuh saiwala, ak is warþ hunsla qiu Guda, wairþands alabrunsts faura andahaita seinamma du Xristau, jah in þaim 26 martyram anaaukans was.

Namna þize martyre sind: Wereka Gudja jah Batwins Gudja, Arpulas Monakus, 11 gamainjai Abippas, Hagias, Ruias, Aigaþraks, Eskoes, Silas, Sigetsas, Swairilas, Swaimblas, Þairþas jah Filgas, jah 7 gamainjos Anna, Allas, Baurgs, Moiko, Kamika, Oneko jah Anemais.

Bi sum jera, in þiudinassau Valaintinianaus jah Þaiaudausiaus (383–392), Gaaþa, widuwo Wingureikis reikis þiudiskis þanei Aþanareiks gasatida du gataujan wrakjos xristeinaize, jah Duklida dauhtar seina, bajoþs xristeinos, galas laibos þize 26 martyre jah miþ andstalda gudjane jah gamainjamma Þyellas haitanamma brāhtedun þos du Syria. Gaaþa aftra qam du landa haimjamma, þarei warþ stainida jah gadauþnoda swe martyr, miþ Agaþaun sunau seinamma. Þos laibos þize weihane martyre wesun anafulhanos Duklidin, soei iddja du Kyzikaus in Asiai leitilai jah atgaf sumans laibo faura gasateinai aikklesjons. Duklida gadauþnoda in gawairþi. In sumaim kalaindārjam, Gaaþa, Duklida jah Agaþaun minþijanda auk miþ þaim 26 martyram.

Kalaindāri gutisk dulþjiþ faura þaim weiham martyram ana 23 Auktobaira, aiþþau gameljanda in kalaindārjin krekiskamma undaro 26 Martjau.

26 Martyros Gutlandis in Krim in razdai gutiskai, skeireins fram Iohannes Haggwiþos (2025).

26 Martyrs of Gothia in the Crimea in the Gothic language, a translation by 2sh (2025).